Vlakte kry eerste buffelkalfie in 200j.
2011-10-05 10:39
Stellenbosch – Die eerste buffelkalfie in 200 jaar is op die Agulhas-vlakte, ’n laagliggende gebied naby Afrika se suidelikste punt, gebore.
Die kalf – wat nog amptelik sy Khoisan-naam moet kry – is lid van ’n trop buffels wat in die Nuwejaars-vleiland Spesiale Bestuursgebied (SBG) hervestig is.
Dié gebied is deel van die Agulhas-vlakte en beslaan 46 000 ha.
Die buffeltjie is op 2 September gebore.
Die Agulhas-vlakte, ’n gebied van 270 000 ha, strek van Stanford tot aan die Breërivier en Afrika se suidelikste punt.
Dirk Human, voorsitter van die SBG, het gesê die laaste buffels is in die laat 1700’s in die streek gesien.
Die kalfie se geboorte is die eerste stap om die gebied se natuurlewe te hervestig.
“Ons het ook seekoeie, wat 150 jaar laas hier gesien is.
“Ons bring stadig die natuurlike stelsel terug, soos dit in die vorige eeue hier op die vlakte bestaan het,” het Human gesê.
Die SBG sluit in 25 grondeienaars in die Overberg-distrik wat hul grond gesamentlik vir bewaring bestuur.
Tydens die onlangse Agri Mega-week op Bredasdorp het lede van die SBG ’n memorandum van samewerking met die Wes-Kaapse minister van landbou en landelike ontwikkeling, Gerrit van Rensburg, onderteken.
Dit verseker noue samewerking tussen die organisasie en die departement om volgehoue biodiverse bewaring en landelike ontwikkeling te bevorder.
Human het gesê buiten 15 buffels is ander wild, soos kwaggas en rooihartebeeste, ook al in hul natuurlike habitat vrygelaat.
Dit vorm alles deel van ’n intensiewe teelprogram met die doel om die diere later in hul natuurlike habitat te hervestig.
Verskeie kameras is ook in die gebied opgestel om beter insig in die wild en voëls se gedragspatrone te kry.
– Volg Nuus24 op Twitter.
- Die Burger