Vitamien C ‘help nie teen griep, verkoue’
2010-04-29 11:03
Elsabé Brits
Kaapstad - Vitamien C help nie om verkoue en griep te voorkom of te behandel nie.
In ’n omvattende studie deur ’n Cochrane-studiegroep onder 11 000 mense wat daagliks minstens 200 mg vitamien C geneem het, is bevind dit het geen of bitter min invloed op die lengte of erns van hul siekte gehad.
Die studie is gelei deur die Australiese Nasionale Universiteit en die Helsinki-universiteit.
Net mense wat aan hoë fisieke stres blootgestel word, soos marathon-atlete, skiërs en soldate in sub-Arktiese toestande, kry voordeel uit die neem van vitamien C vir verkoue. Dié groep het die helfte minder kans gehad om verkoue te kry indien hulle vitamien C geneem het, maar dit bied geen weerstand teen griep nie.
Prof. Harri Hemilä, medeleier van dié internasionale studie, het gesê die voordeel wat dié gewilde kuur vir gewone mense inhou, is so min dat dit nie sin maak om die uitgawes aan te gaan nie.
In 1970 het die Nobelpryswenner Linus Pauling aanbeveel dat mense tot 1 000 mg vitamien C per dag moet neem. Die aanbeveling is tans net 60 mg per dag. ’n Gewone glas vars lemoensap bevat 97 mg.
Hoewel navorsing Pauling verkeerd bewys het, het hy by sy standpunt gebly.
Medici het gesê een van die beste maniere om griep en verkoue te voorkom, is om gereeld jou hande te was en nie aan jy mond, neus en oë te vat nie.
Baie mense oorbeklemtoon die geloof in vitamien C (dat hoë dosisse selfs kanker kan genees) en ander anti-oksidante.
Prof. Peter Sawicki, direkteur van die Instituut vir Gehalte en Doeltreffendheid in Gesondheidsorg in Duitsland, het egter in ’n verklaring gesê: “Daar is nie bewyse dat sommige anti-oksidante ’n mens se lewe kan verleng nie, maar daar is wel bewyse dat sekere produkte selfs tot ’n vroeër dood kan lei.
- Die Burger
“Dit kan moeilik wees om te aanvaar dat sommige van die gelowe mites is, maar hulle is nie waar as navorsing dit nie bewys nie.”
Die oorgebruik van enige anti-oksidant (meer as die aanbevole daaglikse dosis) is die afgelope paar jaar in studies met kanker verbind.