Visse word al kleiner

2013-01-30 14:56

Parys – Met visse wat al hoe kleiner raak as gevolg van die mens se omgewingsimpak, word hulle ook meer blootgestel aan predatore – wat beteken dat ‘n belangrike voedselbron meer bedreig kan word as wat aanvanklik verwag is, het wetenskaplikes Woensdag gesê.

Vorige navorsing het gewys dat verskeie visspesies kleiner raak soos visserbote die groter visse vang en kilmaatsverandering die voedselketting van die visse beïnvloed.

Daar is egter tot onlangs nie navorsing gedoen oor hoe hierdie dramatiese verandering die visse se getalle sal beïnvloed nie.

‘n Span van Australië en Finland het rekenaars gebruik om te voorspel wat met vyf visspesies sal gebeur as hulle getalle vir 50 jaar teen ‘n gemiddelde tempo aanhou krimp.

Die krimping was baie klein, byna vier persent, tog het die sterftesyfer as gevolg van predatore met byna 50% gestyg.

Vier van die vyf spesies se getalle het met byna 35% afgeneem, het die studie in die Royal Society-joernaal Biology Letters gelui.

“Selfs net ‘n klein afname in die grootte van die vis kan ‘n groot impak hê op die spesie se sterftesyfer,” het die studie gelui.

– Volg Nuus24 op Twitter
 

- Sapa - AFP