Vigs-sterftes neem af in SA
2011-03-14 12:42
Kaapstad – Suid-Afrika se Vigs-sterftes het met byna 25% afgeneem as gevolg van verbeterde toegang tot medikasie wat die regering vir verskeie jare geweier het om te voorsien, het nuwe navorsing getoon.
“Die vinnige uitbreiding van ‘n antiretrovirale-program blyk of dit in die laaste paar jaar die sterftesyfer as gevolg van Vigs laat afneem het, het die Aktuariële Vereniging van Suid-Afrika (ASSA) in ‘n verklaring gesê.
Die vereniging se model, wat hierdie week bekendgemaak is, beraam dat Vigs-sterftes van 257 000 ses jaar gelede na 194 000 verlede jaar geval het.
In 2003, voordat die program geloods is, het die program ‘n toename tot 388 000 sterftes in 2010 voorspel, het die vereniging gesê.
Hulle nuutste navorsing beraam dat sowat 10,9 % van Suid-Afrikaners, ongeveer 5,5 miljoen mense, verlede jaar MIV-positief was.
Van 2005 tot 2010 het infeksies onder 15 tot 24-jarige met 1,5 % gedaal, maar onder 15 tot 49-jariges het dit met 0,6 % gestyg.
Dit is gedeeltelik omdat volwassenes langer lewe as gevolg van antiretrovirale-middels.
Ná jare wat die regering geweier het om medikasie te voorsien in een van die wêreld se mees geaffekteerde samelewings, het Suid-Afrika in Desember een miljoen mense gehad wat behandeling ontvang.
Volg Nuus24 op Twitter
- Sapa - AFP