Vietnam: Facebook verban, Zuckerberg welkom
2011-12-27 13:36
Hanoi – Vietnam verbied sy burgers om Facebook te gebruik – maar dit beteken nie dié webwerf se uitvinder, Mark Zuckerberg, kan nie in dié kommunistiese land vakansie hou nie.
Zuckerberg het Oukersaand in die gewilde toeristebestemming Ha Long-baai deurgebring, het Trinh Dang Thanh, 'n plaaslike amptenaar, gesê.
Die staatsbeheerde media het berig dat Zuckerberg op 22 Desember in Vietnam aangekom het.
Zuckerberg het Kersdag in die noordelike bergdorpie Sapa deurgebring, het Le Phuc Thien, adjunkbestuurder van die Topas Ecolodge, gesê.
Zuckerberg, Facebook se 27-jarige uitvoerende hoof, het die sosiale netwerk in 2004 begin.
Vietnam se aggresiewe internetsensors verbied toegang tot Facebook en ander webwerwe, maar jong inwoners van Vietnam weet al hoe om dié beperkinge te omseil.
– Volg Nuus24 op Twitter.
- Sapa - AP