Video: Sjimpansees sien die eerste keer sonlig
2011-09-06 16:56
Kaapstad – Hartroerende beeldmateriaal is vrygestel wat wys hoe sjimpansees wat 30 jaar lank in ‘n laboratorium wetenskaplike toetse moes deurmaak die eerste keer sonlig sien.
Die beeldmateriaal is Sondag op die Duitse televisiekanaal RTL uitgesaai en wys hoe twee volwasse sjimpansees in verwondering na die natuurskoon buite die deur van hul toevlugsentrum staar.
Oorweldig met blydskap gryp die twee mekaar en omhels met glimlagte wat tande van oor tot oor wys.
Die een sjimpansee neem ‘n paar tree in die sonlig in voor die warm lig en helder natuur hom opgewonde na sy vriend laat gryp.
“Ek het ‘n wyfie-sjimpansee gesien wat in verwondering na ‘n skoenlapper gestaar het,” het Michael Aufhauser, die stigter van die Aiderbichl-rehabilitasiesentrum vir diere wat voorheen in laboratoriums aangehou is, gesê. “Sy het dit herken van toe sy nog as kleintjie in die oerwoud was.”
Kyk hier na die beeldmateriaal van die sjimpansees se hereniging met die natuur.
– Volg Nuus24 op Twitter.
- Nuus24