Video: Hond hap na haai in vlak water
2011-07-21 19:24
Sydney – ’n Video-opname wat ’n groot hond, haaie en ’n dooie doegong (’n groot seesoogdier) bevat, het miljoene kykers sedert 1 Junie na YouTube gelok.
Beeldmateriaal van ’n hond wat ’n haai onder die water aan die Australiese kus aanval, het ’n internasionale treffer geword. Dit wys twee honde wat in die see naby die Wes-Australiese dorp Broome, sowat 1 650 km noordoos van Perth, swem.
Dit lyk of die honde ’n klompie haaie na die strand aankeer, wanneer een skielik onder die water induik en die haai aanval.
“Die hond byt die haai!” het Russell Hood-Penn gegil terwyl hy die voorval op sy kamera vasgelê het. “Dis ongelooflik! Nou het ek alles gesien.”
Hood-Penn het die beeldmateriaal op YouTube gelaai, waar dit deur meer as 27miljoen kykers gesien is.
’n Mens kan ook ’n dooie doegong sien wat op die strand uitgespoel het. Hood-Penn bespiegel dit is moontlik die rede waarom die haaie so naby die strand swem.
Teen die einde van die video kom die hond bo die water uit en skud hy water uit sy pels.
Almal gis nog oor die haai se lot...
Kyk hier na die video.
– Volg Nuus24 op Twitter.
- Die Burger