Video: Bok duik fietsryer van sy wiele af
2011-10-13 08:37
Pietermaritzburg – Evan van der Spuy se “botsing” met ’n hartebees het oornag een van die gewildste soek-onderwerpe op YouTube geword. Daar is teen gister reeds meer as 5 miljoen keer na beeldmateriaal daarvan op YouTube gekyk.
Evan (17) sê hy is steeds oorweldig oor die aandag wat hy skielik kry. Hy het Sondag aan ’n bergfietsren hier deelgeneem toe die bok hom van sy fiets af gespring het.
“Dit vat nog tyd om in te sink en ek probeer om dit te verwerk. Ons telefone lui onophoudelik vir onderhoude,” het hy gesê.
Die jong bergfietsryer sê hy sukkel nog met ’n stywe nek. “Dit het my geensins afgeskrik nie.”
Evan en die bok is ongedeerd.
Intussen het Trish Wilson van Howick, wat ook aan die bergren by die Albert Falls Dam-wildpark deelgeneem het, gekla oor die uitbeelding van die weerlose bok. Sy het gesê dit het gelyk of die diere verontrus was, omdat “die park vol mense was”.
Die organiseerder van die wedren, Max Cluer, het gesê die voorval was ’n fratsongeluk en die eerste in sy soort. Dit was bloot ’n kwessie van op die verkeerde tyd op die verkeerde plek te wees.
“Dit was man teen die natuur in die natuur.”
Cluer het gesê 99,9% van die reaksie op YouTube is positief.
Die TV-kanaal National Geographic stel ook in die beeldmateriaal belang vir Caught in die act, ’n nuwe TV-reeks wat fokus op bisarre beeldmateriaal oor wild.
“Hulle is stomgeslaan daardeur en sê hulle het nog nooit so iets gesien nie. Hulle wil dit ook vir navorsing gebruik,” het Cluer gesê.
Kyk hier na die video.
– Volg Nuus24 op Twitter.
- Die Burger