Vergeet koffie, asem jou kafeïen in
2012-02-08 13:48
Cambridge, Massachusetts – Vergeet maar van koffie en Red Bull.
‘n Professor van Harvard het 'n nuwe manier bedink vir mense om hul kafeïen-inspuiting te kry – nou kan jy dié wondermiddel deur ‘n buisie so groot soos ‘n lipstiffiehouer inasem.
AeroShot het verlede maand in Massachusetts en New York op die mark gegaan. Dit is ook in Frankryk beskikbaar.
Elke plastiekhouertjie bevat 100 milligram kafeïenpoeier, ongeveer dieselfde hoeveelheid as wat in ‘n groot koppie koffie teenwoordig is. Een eenheid kos $2,99 (R22,60).
Kritici is van mening dat die produk nie sonder risiko’s is nie.
Nietemin sê prof. David Edwards AeroShot is veilig en dit bevat nie bymiddels wat in algemene energiedrankies gebruik word om die kafeïen-effek te verhoog nie.
Die Amerikaanse senator Charles Schumer wil egter hê gesondheidsowerhede moet die produk ondersoek.
Hy is bang dat dit as ‘n dwelmmiddel in klubs gebruik kan word sodat jongmense kan drink tot hulle omslaan.
‘n Woordvoerder vir die Food and Drug Administration het geweier om kommentaar te lewer.
– Volg Nuus24 op Twitter
- Sapa - AP