Verbod op Gmail in Iran opgehef
2012-10-01 13:30
Tehran – Iran het hul verbod op Gmail opgehef, maar beplan glo steeds om YouTube te verbied.
Internetgebruikers kon Maandag vir die eerste keer sedert 24 September hul Gmail-rekeninge gebruik.
Iran se departement vir telekommunikasie het vroeër die staking van Google se e-posdiens aangekondig, en bygevoeg dat 'n plaaslike diens vir Iranse burgers op die been gebring gaan word.
Abdolsamad Khoramabadi, die sekretaris van ‘n groep wat onwettige internetinhoud moet opspoor, het verlede week gesê dat Google en Gmail landswyd gesensuur word.
Mohammad Reza Miri, ‘n amptenaar by die departement vir telekommunikasie, het egter Maandag gesê die verbod op Gmail het onwillekeurig plaasgevind toe die regering Google se video-webtuiste, YouTube, wou blok.
“Ongelukkig het ons nog nie die tegniese kennis om tussen die twee dienste te onderskei nie. Ons wou YouTube blok en toe blok ons onwillekeurig vir Gmail,” het Miri gesê.
“Ons wil nie hê YouTube moet toeganklik wees nie. Dit is hoekom ons daaraan werk om YouTube te blok en Gmail toeganklik te maak.”
Kamyar Saghafi, ‘n lid van Iran se kuberruim-raad, het verlede week gesê dat Iran vir YouTube wil blok om te keer dat hul inwoners ‘n anti-Islam rolprent sien wat glo die spot dryf met die profeet Mohammed. Die video het al verskeie betoging regoor die wêreld veroorsaak.
Iran het sowat 34 miljoen internetgebruikers en die beperkings op Gmail en Google is deur verskeie amptenare gekritiseer.
– Volg Nuus24 op Twitter
- AFP
