Verbied verkoop van dié bababottels gou – Kansa
2011-08-17 07:02
Pretoria – Die Kankervereniging van Suid-Afrika (Kansa) beywer hom daarvoor dat voorgestelde regulasies gou ingestel word om die verkope van bababottels met bisfenol A (BPA) te verbied.
Dit is onder meer weens vrese dat bababottels wat dié mensgemaakte chemikalie bevat in die Suid-Afrikaanse mark gestort word omdat die verkope al in verskeie ander lande verbied is.
BPA, wat in sommige plastiekverpakkings vir kos en drinkgoed voorkom en deur polikarbonaatprodukte vrygestel kan word, word met verskeie siektetoestande, soos kanker, verbind.
Dr. Carl Albrecht, kankernavorser van Kansa, het Dinsdag gesê bababottels wat BPA bevat, is al in 2008 in Kanada verbied en daarna in Denemarke, die Europese Unie en China.
Dr. Aaron Motsoaledi, minister van gesondheid, het op 25 Maart regulasies om die verkope van dié bottels te verbied vir kommentaar in die Staatskoerant gepubliseer.
Kansa vergader later die maand weer met die minister oor die kwessie en Albrecht het gesê hy hoop die regulasies word voor einde vanjaar deurgevoer.
Volgens Albrecht is daar sedert die eerste verbod oorsee nog navorsing gepubliseer wat wys BPA in dierestudies vergroot rotte se kans om kanker te kry.
Die chemikalie bind met die estrogeenreseptor in die liggaam. Die chemikalie se vermoë om estrogeen na te maak, kan glo die mens se endokrinologiese prosesse ontwrig. Daar word ook gevrees dat dit selverdeling, ’n hoogs gereguleerde liggaamsproses, kan ontwrig.
Studies in muise het getoon uiters lae dosisse BPA (25 nanogram per kilogram liggaamsgewig) kan abnormale weefsel in borsweefsel laat ontwikkel.
Babas is vatbaarder vir BPA-skade, onder meer omdat hulle nie soos volwassenes die ensieme het om die produk behoorlik af te breek nie. Babas eet boonop per kilogram liggaamsgewig tien keer meer as volwassenes.
Dié bottels word nie plaaslik vervaardig nie, maar ingevoer.
Kyk só
- Bababottels wat BPA bevat, het gewoonlik ’n kenmerkende driehoekige herwinningsembleem aan die onderkant met die syfer 7 binne-in en die afkorting PC.
- As daar geen embleem is nie of ’n leë driehoek, is die inhoud van die plastiek dalk twyfelagtig, waarsku Kansa.
– Volg Nuus24 op
Twitter
- Beeld