Veldtog teen Facebook begin oor privaatheid
2011-10-28 08:00
Wene – Toe ’n Oostenrykse regstudent Facebook gevra het om sy persoonlike inligting van die afgelope drie jaar aan hom te stuur, was ’n CD met 1 200 bladsye vol data die laaste ding wat hy verwag het.
Dit het ingesluit gesprekke wat hy lankal uitgevee het en uitnodigings na geleenthede waarop hy nooit gereageer het nie, en dit het die 24-jarige mnr. Max Schrems dwars in die krop gesteek.
Europeërs, veral Duitsers, is bekommerd oor die privaatheid van hul inligting.
Schrems het ’n aanlynveldtog begin om Facebook te dwing om Europese wetgewing oor die privaatheid van inligting na te kom.
Die veldtog is begin te midde van al hoe meer irritasie oor wat baie beskou as Facebook se indringerige bemarkingspraktyke wat verbruikers se besonderhede sonder
respek vir hul reg op privaatheid ontleed.
Een van die klagtes is dat Facebook persoonlike inligting veel langer hou as wat
Europese wetgewing toelaat. Wetgewing bepaal dat ’n maatskappy ’n rede moet hê om inligting langer as ’n paar maande te hou.
– Beeld
– Volg Nuus24 op Twitter.
- Sapa - AP