Vark ná ontbering in aardbewing gekloon
2011-09-19 09:01
Hong Kong – ’n Varkbeer wat meer as ’n maand in die puin van die 2008-aardbewing in China oorleef het, is onlangs suksesvol gekloon.
Zhu Jianqiang, wat “vark met sterk wilskrag” beteken, was 36 dae in die puin nadat ’n aardbewing van 8,0 die Chinese Sichuan-provinsie en omliggende dele getref het.
Die lummel van 150 kg het glo op steenkool en reënwater oorleef terwyl hy onder die oorblyfsels van sy stal vasgekeer was.
Hy was ’n nasionale held ná sy redding.
Luidens die Sunday Morning Post het wetenskaplikes in die stad Shenzhen eksperimente op die vark begin doen. Die eindresultaat was ses varkies waarvan die DNS identies aan dié van hul pa is.
Hoewel die dier reeds voor die aardbewing gekastreer is, intense trauma beleef het en vyf jaar oud is (sowat 60 mensjare), is die klone gebore.
Du Yutao, leier van die kloonprojek, het ná die geboortes trots verklaar: “Dié wonderlike vark het ons almal weer verras.”
Die klone het soos die beer ook ’n geboortemerk tussen hul oë.
– Volg Nuus24 op Twitter.
- Sapa - AFP