Vandale vernietig 1 600 jaar oue argeologiese skat
2012-05-30 11:30
Jerusalem – Vandale het 'n 1 600 jaar oue mosaïek in die noordelike Israelse stad Tiberias, wat die vloer van 'n antieke sinagoge gevorm het, erg beskadig.
Dele van die vloer is in stukke gekap, en graffiti is op ander dele geverf, het amptenare gesê.
Kenners vermoed dat ultra-ortodokse Jode, wat soms gewelddadig protes aanteken teen opgrawings wat volgens hulle by antieke grafte gedoen word, vir die voorval betrokke is. Geen groep het tot dusver vir die skade verantwoordelikheid aanvaar nie, en die polisie ondersoek die saak.
"Op elke graf, 'n opgrawing," het een van die slagspreuke wat in Hebreeus op die mosaïek geskryf is, gelui.
Wagte het Dinsdagoggend op die skade afgekom, het argeoloë gesê.
Die mosaïek, wat sowat 400 jaar ná die geboorte van Jesus geskep is, was een van die beste voorbeelde van 'n mosaïek uit dié periode.
– Volg Nuus24 op Twitter.
- SAPA
