Uitlek van geheime het Amerika op hol
2010-07-28 08:36
Die Burger
Washington – Die uitlek van ongeveer 90 000 geheime militêre lêers het Dinsdag luide protes ontketen in lande wat in Afganistan veg.
Terselfdertyd het die Pentagon bontgestaan om die bron van die uitlekkery te identifiseer en vas te stel of dit lewens – of selfs die veiligheid van Amerika – in die gevaar kan stel, het ’n woordvoerder van die Pentagon, Geoff Morrell, aan Fox News gesê.
Sowat 92 000 dokumente gedateer van 2004 tot 2009 is Sondag deur die webblad WikiLeaks aan die New York Times, die Guardian in Engeland en Duitsland se Der Spiegel beskikbaar gestel.
Die mees omstrede aantygings is bewerings dat Pakistan, ’n sleutelbondgenoot in die onstuimige gebied, sy spioene toelaat om direk met die Taliban te vergader.
Volgens The Times vergader Pakistanse agente en verteenwoordigers van die Taliban gereeld “in geheime strategiesessies om netwerke van militante groepe wat teen Amerikaanse soldate in Afganistan veg, te organiseer”. Planne word selfs gemaak om sluipmoorde op Afgaanse leiers te pleeg.
In die lêers word ook beweer dat die dood van onskuldige burgerlikes toegesmeer is en dat Iran Taliban-militante finansier, agt jaar nadat die Amerikaans beheerde inval die radikale Islamitiese-regime omvergewerp het.
Die omstrede onthullings het verontwaardiging veroorsaak. ’n Senior Navo-generaal het ’n beroep op die Withuis gedoen om meer waaksaam te wees.
Die Withuis het die uitlekkery as “onverantwoordelik” bestempel.
Die koalisie behoort daarvan bewus te wees dat “party dokumente in die openbaar is weens die uitlekkery”.
“Dit verplig ons om met die grootste versigtigheid te werk,” het genl. Egon Ramms, wat in beheer van die Navo-magte in Afganistan is, gesê.
Die stigter van WikiLeaks, Julian Assange, het egter sy besluit om die lêers uit te lek verdedig en gesê dit wys “duisende” oorlogsmisdade mag in Afganistan gepleeg word”.
- Sapa - AFP