Uitgewers volg digitale pad
2009-11-26 04:34
Washington - Die uitgewers, Time Inc, Conde Nast en Hearst gaan blykbaar binnekort ‘n gesamentlike aanlyn-koerantstalletjie, wat beskryf word as die “iTunes vir tydskrifte”, bekendstel.
Die New York Times, wat “mense met kennis van dié planne” aangehaal het, het gesê die stigting van die nuwe maatskappy kan dalk vroeg in Desember aangekondig word.
Dié koerant het gesê Time Inc, Conde Nast, Hearst en nog ‘n uitgewer, Meredith, sal gelyke vennote in die nuwe onderneming wees, in ‘n tyd waar dalende sirkulasiesyfers 'n werklikheid vir baie Amerikaanse tydskrifte is.
Verder het die koerant gesê dat die nuwe maatskappy papier- sowel as elektroniese-uitgawes van sy tydskrifte op ‘n een webtuiste sal aanbied.
Die maatskappy sal ook ‘n sagtewarepakket ontwikkel vir lesers om tydskrifte op iPhones, BlackBerry selfone en elektroniese boeklesers te lees.
Die New York Observer het berig dat John Squires, ‘n uitvoerende hoof by Time Inc, as die tussentydse uitvoerende hoof van die nuwe maatskappy sal optree.
Soos ander Amerikaanse koerant- en tydskrif-uitgewers, het Conde Nast en Time Inc. ‘n drastiese afname in advertensie inkomste, dalende sirkulasiesyfers en lesers wat na gratis nuus op die internet beweeg, ervaar.
Time Inc. wat tydskrifte soos Time, Fortune, Sports Illustrated en People uitgee, is besig met grootskaalse afdankings na die besnoeing van ongeveer 600 poste verlede jaar.
Dié uitgewer moes ook van sy titels soos Southern Accents en Life toemaak.
Conde Nast, wat The New Yorker, Vanity Fair en Vogue besit, moes ook reeds die tydskrifte Gourmet, Modern Bride, Elegant Bride en Cookie staak.