Meeste e-posse is pespos
2011-01-19 10:02
Washington. – Internetgebruikers het verlede jaar 107 triljoen e-posse gestuur, waarvan die meeste gemorspos was.
So het die webmoniteringsdiens Pingdom berig.
’n Gemiddelde van 294 miljard e-posse word volgens dié diens daagliks gestuur waarvan sowat 89% gemorspos is.
Volgens Pingdom was daar teen Junie verlede jaar al 1,97 miljard internetgebruikers: 825,1 miljoen in Asië, 475,1 miljoen in Europa, 266,2 miljoen in Noord-Amerika, 204,7 miljoen in Latyns-Amerika en die Karibiese Eilande, 110,9 miljoen in Afrika, 63,2 miljoen in die Midde-Ooste en 21,3 miljoen in Oseanië en Australië.
Daar is glo 2,9 miljard e-posrekeninge wêreldwyd en 152 miljoen blogs.
Twitter het verlede jaar 100 miljoen nuwe gebruikers gehad wat die totaal in September 2010 op 175 miljoen te staan gebring het. Sowat 25 miljard twiets is verlede jaar geskryf, het Pingdom berig.
Volg Nuus24 op Twitter
- Sapa - AFP