UV spog met nuwe simulasie-eenheid vir mediese studente
2013-02-20 13:08
Bloemfontein – Die Universiteit van die Vrystaat (UV) se fakulteit van gesondheidwetenskappe open Woensdag sy kliniese simulasie-eenheid, waar mediese studente die kans het om hul vaardighede op gerekenariseerde poppe te slyp.
Die poppe sal dien as pasiënt-nabootsers en sal scenario’s skep wat gereeld in mediese omgewings voorkom.
Die studente sal dan op die poppe kan leer hoe om werklike situasies te hanteer.
“Dit is baie moeilik om ’n student aan ’n realistiese, lewensbedreigende situasie bloot te stel en hulle terselfdertyd op te lei,” het dr. Mathys Labuschagne, hoof van die simulasie-eenheid, aan Volksblad gesê.
“Deur hulle op ’n pasiënt-nabootser te leer, kan hulle dit beleef asof dit ’n regte pasiënt is.”
Labuschagne het bygevoeg dat dit die eerste kampus in Afrika is wat ‘n eenheid het wat in sy geheel op simulasie fokus.
Die sentrum is toegerus met ’n operasieteater, intensiewesorgeenheid, twee simulasie- en drie private kamers. Daar is ook ’n ontlontingskamer waar opgeneemde scenario’s teruggespeel en bespreek word sodat studente uit vorige ervarings kan leer.
Die poppe word deur ’n rekenaarstelsel beheer en boots verskeie toestande en ongevalle na waarmee studente moontlik in hospitale of klinieke in aanraking sal kom.
Die drie poppe met die meeste funksies staan bekend as SimMan, SimMum en SimBaby.
SimMan haal asem, het hart-, buik- en longklanke, kan sy oë knip en selfs bloei.
SimMum skenk geboorte.
“Dit kan ’n normale geboorte wees of die baba kan verkeerd gedraai wees waar die student dan die verlossing moet doen,” het Rian van Wyk, tegniese spesialis in die sentrum, gesê.
– Volg Nuus24 op Twitter
