Twitter-gebruikers skater oor Malema-kommentaar
2010-11-04 11:19
Johannesburg – Twitter-gebruikers het Donderdagoggend op dié sosiale netwerk geskaterlag oor die nuus dat Julius Malema, leier van die ANC-Jeugliga (ANCYL), Twitter wil laat sluit.
Die “Tweets” het behoorlik ingerol en internasionale nuus-webtuistes soos die BBC het ook die storie opgetel.
“Julius Malema wil Twitter sluit? Hahahahahahahahahaha,” het verskeie gebruikers geantwoord op ‘n inskrywing deur die 5fm-platejoggie Gareth Cliff.
‘n Ander gebruiker, Garethdv, het bygevoeg: “Die ANC wil Twitter laat sluit… hulle is waarlik ‘n klomp begaafde individue!”
Nog ‘n gebruiker, kerryannerogers, het taalfoute in die Jeugliga se verklaring uitgewys. “Die ANCYL vra om die ‘closer of Twitter’ na aanleiding van ‘cretation’ van vals profiele. Is dit sodat ons weet dit is die regte Malema?”
Die ANCYL het Woensdag gesê hulle sal vra vir die sluiting van Twitter as die sosiale netwerk se administrateurs niks doen om Malema-nabootsers te keer nie.
“Ons sal maniere vind om dit te keer… selfs al beteken dit ons moet na die polisie gaan,” het die liga se woordvoerder, Floyd Shivambu, in ‘n verklaring gesê.
‘n Soektog op Twitter na “Malema” lewer 12 gebruikers, insluitende Julius_Malema, JMalema, Julius_S_Malema en jujumalema.
Uit die 12 gebruikers het ses ‘n foto van die jeugligaleier by.
Die vertolkers het Donderdagoggend lustig voortge-“tweet”.
- Volg Nuus24 op Twitter
- SAPA