Twitter-boodskappe 'vertel storie van VSA'
2013-01-22 12:59
Washington – Die Amerikaanse Library of Congress het die enorme taak op hom geneem om Amerikaners se miljarde Twitter-boodskappe in argiewe te stoor.
Die biblioteek sal elk van die 400 miljoen twiets wat Amerikaners daagliks skryf, versamel, omdat elkeen van die boodskappe volgens dié instansie ‘n klein, maar belangrike deel van die land se verhaal verteenwoordig.
“Ons doel by die Library of Congress is om die storie van Amerika te vertel en om versamelings te bekom wat navorsingswaarde het,” het Gayle Osterberg, direkteur van kommunikasie, gesê.
Die Library of Congress, wat in Washington geleë is, huisves miljoene geskiedkundige boeke en dokumente sowel as ‘n internet-argief wat miljoene bykomende werke van die afgelope twee eeue stoor.
Twitter het in April 2010 ‘n ooreenkoms met die biblioteek bereik waarvolgens hy toegang het tot die maatskappy se twiets, wat terugdateer tot die ontstaan van Twitter in 2006.
– Volg Nuus24 op Twitter
- Sapa - AFP
