Trouklokkies lui vir Bolandse vrou op Skype
2011-06-24 09:11
Kaapstad – 'n Wellingtonse vrou gaan geskiedenis maak wanneer sy en haar verloofde deur middel van Skype in die huwelik bevestig word.
Margaret Steinegger-Keyser (50), 'n konfliktransformasie-praktisyn en die eerste vroulike teologie-student aan die Universiteit van Wes-Kaapland en haar verloofde Jim Ault (60), 'n filmmaker, gaan Saterdag op 25 Junie deur middel van Skype in die huwelik bevestig word.
Nie net is dit die eerste keer dat so ‘n groot gebeurtenis die Bolandse dorp Wellington te beurt val nie, maar dit is ook die eerste keer in Suid-Afrika dat ‘n troue, met die predikant op een kontinent en die paartjie op ‘n ander, plaasvind.
Die twee, wat vir die afgelope twee jaar verloof is en in Amerika woon, het in 2009 by 'n begrafnis in Connecticut ontmoet.
Steinegger-Keyser het ds. Reggie Boesak van Montagu gevra om hulle in die huwelik te bevestig. Ds. Boesak was Steinegger-Keyser se mentor terwyl sy by die Universiteit van Wes-Kaapland gestudeer het en is ook ’n goeie familievriend.
Die toekomstige bruid het aanvanklik nie geweet dat haar hele familie die troue, wat regstreeks op Skype vanaf die Kaapse Skiereiland Universiteit van Tegnologie (KPUT) se Wellingtonse kampus gaan plaasvind, sou bywoon nie.
"Ons het haar gister eers ingelig en sy het dit glad nie verwag nie," het Zanephyn aan Nuus24 gesê.
Volgens hom sal slegs 30 mense die troue in Wellington bywoon omdat "ons dit klein en intiem" wil hou.
– Volg Nuus24 op Twitter.