Top Nieu-Seelandse wetenskaplike 'n liegbek
2010-10-29 00:57
Wellington – Die Nieu-Seelandse weermag is “baie verleë” ná ‘n ondersoek aan die lig gebring het dat hulle sekuriteitstoegang tot op die hoogste vlak aan ‘n wetenskaplike wat in ‘n uitgebreide fantasiewêreld leef verleen het.
Stephen Wilce was aangestel as die hoof van Defence Technology Agency, maar het verlede maand bedank toe die uitkom dat hy gelieg het oor die feit dat hy ‘n eks-Seesoldaat was wat op Olimpiese vlak teen Jamaika se “Cool Runnings”-span gekompeteer het.
‘n Ondersoek het bevind dat dié top-wetenskaplike sedert sy kinderdae stories oor homself opmaak.
Hy het blykbaar al stories opgemaak oor sy dae as ‘n helikopter-vlieënier, toe hy skynbaar saam met Prins Andrew diens gedoen het.
In Wilce se fantasiewêreld, was hy ook ‘n spioen vir die Britse intelligensie en selfs op die IRA se doodslys gewees.
Wilce het ook vertel dat hy vir die span van Wallis se rugby-unie gespeel het, kaptein was van die Koninklike Vloot se swemspan én ‘n kitaarspeler was vir Britse folk-musikante.
Die ondersoek het bevind dat Wilce op sy CV gelieg het om dit beter te laat lyk en dat sy aanstelling met onnodige has deurgevoer is.
“’n Paar dom besluite is geneem,” het luitenant generaal Jerry Mateparae gesê.
Wilce was die hoof van 80 personeellede wat vir vyf jaar tegnologiese ondersteuning aan Nieu-Seeland se weermag gebied het
Alhoewel Wilce nie ‘n daadwerklike bedreiging vir Nieu-Seeland se sekuriteit ingehou het nie, het die hele saga beslis die weermag van Nieu-Seeland se reputasie in gedrang gestel.
Volg Nuus24 op Twitter.