Toetsuitslae oor voëlgriep kom gouer
2011-11-10 09:07
Oudtshoorn – ’n Nuwe laboratorium gaan help dat volstruisboere in die Klein-Karoo baie vinniger die resultate van toetse vir die H5N2-virus bekom.
“Ons kan die uitslag van bloedtoetse binne drie dae verskaf, waar boere in die verlede tot drie weke moes wag,” het dr. Hannes Swart, uitvoerende hoof van Deltamune, gister by die bekendstelling van die nuwe geriewe gesê.
Die volstruisbedryf is in April vanjaar tot stilstand gedwing nadat bloedmonsters van slaggereed-volstruise positief vir teenliggaampies van die H5N2-virus getoets het.
“Die Veeartsenykundige Instituut op Onderstepoort kon nie voorbly met die toetse nie en het ons van die begin af uitgehelp.
“Die Europese Unie vereis dat ’n laboratorium wat aan internasionale standaarde voldoen in die krisisgebied gevestig moet word, asook dat baie meer monsters vir die virus ontleed word.”
Teenliggaampies in die bloed toon dat die volstruise reeds die virus gehad het, maar tot dusver kon die oorsprong van die virus nie vasgestel word nie.
Swart meen dat uitgebreide Polimerase Kettingreaksie-toetse (PKR) wat genetiese materiaal van die virus aandui, ingespan kan word om die oorsprong van die virus vas te stel.
Een van die toetsapparate in die laboratorium vir intydse PKR-toetse stel die laboratorium in staat om 96 monsters op ’n keer te ontleed. Dit is die hoeveelheid wat nodig is om die voorgeskrewe toetse vir 48 volstruisplase per dag te doen.
“Vinniger toetse sal daartoe lei dat resultate vinniger beskikbaar is. Volstruise wat negatief toets, kan dan vinniger geslag word. Sodoende kan boere die geld spaar wat hulle aan die voer van voëls moes bestee indien hulle langer vir resultate moes wag.”
Swart het gesê die krisis kan opgelos word as al die volstruisboere saamwerk en binne die reëls bly.
“Almal moet streng ag slaan op biosekuriteit, wat die risiko van besmetting wel beperk. Meer PKR-toetse moet gedoen word om vas te stel waar die oorsprong van die virus is.
“Die volstruisbedryf moet meer gesofistikeerd raak en kan by die res van die pluimveebedryf gaan kers opsteek, veral wat biosekuriteit betref.
“Die bedryf sal ook moet herstruktureer om moontlike oor-en-weer-besmetting tussen slagvoëls en broeivoëls te voorkom. Ons het die kennis en ervaring en wil deel van die oplossing wees.”
– Volg Nuus24 op
Twitter.
- Die Burger
