Titanic-skatkis vir miljoene verkoop

2012-10-17 12:26

Londen – Die maatskappy Premier Exhibitions sal artefakte wat by die wrak van die Titanic gevind is, teen 'n totale prys van $189 miljoen (sowat R1,6 miljard) verkoop in 'n enkele transaksie.

Die wrak, wat in 1985 deur die ontdekkingsreisiger Robert Ballad ontdek is, het glo al meer as 5 500 artefakte vir die maatskappy opgelewer. Die maatskappy het sedert 1987 al agt ekspedisies na die skip onderneem.

Die voorwerpe wissel van delikate porseleinbreekgoed tot silwer eetgerei.

Die Titanic het 100 jaar gelede gesink toe dit ‘n ysberg in die Atlantiese oseaan getref het. Meer as 1 500 mense is in die tragedie dood.

Premier Exhibitions se aandeelprys het Dinsdag met 18% gestyg ná die maatskappy gesê het hy gaan die artefakte aan ‘n obekende groep verkoop.

Die maatskappy wil al jare lank sy Titanic-artefakte verkoop om meer op toere te fokus, maar ‘n hof het verlede jaar beslis dat die versameling bymekaar gehou moet word as dit verkoop word.

– Volg Nuus24 op Twitter
 

- Reuters