Tiere raak steeds minder
2009-10-27 16:31
Katmandu, Nepal - Die wêreld se tierbevolking is vinnig aan die afneem ten spyte van pogings om hulle te red, het natuurkenners by 'n konferensie gesê.
“Ons is hier om die tiere van uitwissing te red,” het Yuvaraj Bhusal, Nepal se sekrataris van bos-en grondbewaring, aan verteenwoordigers van 20 lande, insluitend 12 lande waar dié wilde tiere nog voorkom, gesê.
‘n Geskatte 3 500 tot 4 000 tiere bewoon deesdae die woude, in vergelyking met 100 000 tiere wat aan die begin van die 20ste eeu geleef het. Al die tiere woon in Asië.
Bywoners van dié konferensie, wat die Wêreldbank en die Wêreldnatuurfonds (WWF) insluit, beplan om strategieë vir die bewaring van tiere te bespreek, asook uitdagings rondom onwettige handel en konflik tussen die tiere en die plaaslike bevolking.
“Ten spyte van ons beste pogings in die laaste drie dekades word tiere steeds deur uitwissing bedreig. Die tiere se grootste bedreiging is wildstropery en die verlies van habitat,” het Nepal se eerste minister, Madhav Khumar by die konferensie gesê.
Die 12 lande waar wilde tiere nog voorkom is Bangladesj, Bhoetan, Kambodja, China, Indië, Indonesië, Laos, Mianmar, Nepal, Rusland, Thailand and Viëtnam.
Die konferensie duur tot Vrydag.
- Sapa-AP