Tiener met kanker se laaste wense op Twitter
2011-06-09 12:24
Kaapstad – Alice Pyne is ‘n 15-jarige murgkankerpasiënt van Ulverston in Brittanje wat besig is om haar vier jaar lange geveg teen die siekte te verloor.
Die dapper tiener het haar egter nie laat onderkry nie en haar laaste wense val op derduisende ore op Twitter.
Dié sosiale netwerk gons behoorlik oor Pyne se wense en las dié #hutsmerker aan elke ondersteunende boodskap: #alicebucketlist.
"Hartroerend," het een gebruiker getweet.
“Alice ly aan kanker en een van haar wense is om op Twitter te trend,” het 'n ander getweet.
Haar naam het Donderdag wêreldwyd as die derde gewildste onderwerp op Twitter gepronk, en was heel bo aan die lys in die Verenigde Koninkryk.
Op haar blog het Alice haar laaste wense gelys, maar die wens om die gewildste onderwerp op Twitter te wees, is egter nie ingesluit nie.
“Om ‘n hoop sjokolade by Cadbury World te eet,” is egter een van haar onskuldige wense.
Sy wil ook haar fyn hare laat mooimaak en 'n rugmassering ontvang.
“Ek hoop om alles op die lys gedoen te kry voor ek julle moet verlaat,” het sy geskryf.
Sy sluit haar inskrywing af met ‘n pleidooi aan lesers om by plaaslike skemas vir beenmurg-oorplantings aan te sluit.
Lees Alice se wense hier.
Volg Nuus24 op Twitter.
- Nuus24