Televisie op selfone eersdaags beskikbaar
2010-09-11 14:14
Johannesburg – E.tv en Multichoice is die lisensies toegeken om televisie op selfone uit te saai, het die Onafhanklike Kommunikasie-owerheid van SA (Okosa) Vrydag gesê.
Okosa wou aanvanklik die digitale video uitsendingdiens gereed hê vir die Wêreldbeker-sokkertoernooi. Dit sou beteken dat baie Suid-Afrikaners die sokker op hul selfone kon gekyk het.
Okosa het hul sperdatum gemis en ‘n uitnodiging was in April vanjaar uitgestuur. Vier aansoeke is ontvang vanaf MultiChoice, Mobile TV Consortium, Super 5 Media en e.tv.
Die eerste drie applikante is gediskwalifiseer omdat hulle nie aan die vereistes voldoen het nie.
E.tv het vir 40% kapasiteit van die frekwensie aansoek gedoen. ‘n Tweede uitnodiging vir die oorblywende 60% is vanjaar in Mei uitgestuur.
Twee aansoeke vanaf MultiChoice en Super5 is ontvang, waarna Super 5 hul aansoek onttrek het.
Volgens Robert Nkuna, raadslid van Okosa sal die dienste binne die volgende 12 maande beskikbaar wees indien alles volgens plan verloop.
- Volg Nuus24 op Twitter.
- SAPA