Tegnologiereuse geraps oor energieverbruik
2012-04-18 11:30
New York – Amazon, Apple en Twitter het Dinsdag swak gevaar in ‘n Greenpeace-studie van tegnologiereuse se gebruik van skoon energie in die groeiende “internetwolk”, terwyl Facebook, Google en Yahoo! geprys is.
Dié “wolk” verwys na inligting wat op die internet gestoor word.
Greenpeace se “How Clean is your Cloud?”-verslag, wat beskryf word as ‘n noodkreet, eerder as kritiek, het gekyk na die maatskappye se gebruik van datasentrums en ander energiekwessies,
“Ons probeer nie om dit vir hulle moeilik te maak nie, ons wil hulle opbou om die regte ding te doen,” het Greenpeace se senior veldtog-spesialis, Casey Harrell, aan AFP gesê.
“Ons is mal oor ons iPhones, hulle maak ons lewens beter; maar hulle moenie die planeet ‘n erger plek maak nie.”
Cupertino, die tuiste van Apple Inc. In Kalifornië, het ‘n “D” gekry vir die doeltreffendheid van datasentrums, die verspreiding van inligting rakende die gebruik van krag en die werwing van dienste om skoon energie te verskaf.
Apple het gedruip met ‘n “F” toe dit kom by die opspoor van datasentrums in plekke waar elektrisiteit van skoon bronne afkomstig is, eerder as van steenkool.
Nietemin het Apple Greenpeace se bevindings verwerp en sê dit is verouderd en prontuit verkeerd. Apple is van mening dat hy ‘n voorstander is as dit daarby kom om datasentrums na skoon energie te skuif.
Die maatskappy se nuwe datasentrum in Noord-Carolina is daarop gemik om meer as 60% van sy energie van hernubare bronne te kry, insluitende ‘n sonplaas op die terrein.
Die fasiliteit sal “die groenste datasentrum wees wat nog ooit gebou is” en volgende jaar sal daar een in Oregon opgerig word wat geheel en al deur hernubare energie gedryf word, het ‘n woordvoerder van Apple, Kristin Huguet, gesê.
Amazon.com en Amazon Web Services het gedop in alle kategorieë behalwe as dit kom by die doeltreffendheid van energie in datasentrums, waar ‘n “D” toegeken is.
Tegnologie-maatskappye is geneig om geheimsinnig te wees as dit kom by energieverbruik by datasentrums as gevolg van kompeterende redes en Amazon.com sê die inligting wat Greeenpeace oor sy datasentrums afgelei het is “onakkuraat”.
– Volg Nuus24 op Twitter
- AFP
