Tegnologie-reuse in die sop oor hoë pryse

2013-02-11 16:50

Sydney – Die tegnologie-reuse Microsoft, Apple en Adobe moet verduidelik hoekom hul produkte soveel duurder in Australië is as in ander lande.

Die komittee wat die ondersoek in Mei 2012 van stapel gestuur het, het die drie maatskappye Maandag beveel om in Maart tydens ‘n openbare verhoor te verduidelik waarom Australiese kliënte meer betaal vir dieselfde produkte.

“Australiese verbruikers betaal veel hoër pryse vir harde- en sagteware as wat mense in ander lande betaal,” het die komitee in ‘n verklaring gesê.

Die ondersoek is van stapel gestuur ná verskeie groepe beweer het dat die maatskappye met pryse diskrimineer teen Australiese verbruikers.

Volgens die verbruikersorganisasie Choice betaal ‘n Australiese burger gemiddeld 73% meer om 'n snit of program op iTunes af te laai as ‘n Amerikaner. Rekenaarprodukte kos 69% meer en rekenaarspeletjies 232% meer.

Sagteware is sowat 34% duurder in Australië, terwyl hardeware 41% duurder is.

Een spesifieke sagtewarepakket het $8 939 (sowat R79 400) meer gekos om in Australië te koop, ‘n gaping wat Choice as "verskriklik onredelik" beskryf het.

“Vir hierde bedrag is dit goedkoper om iemand vir 46 uur in diens te neem teen ‘n prys van $21,30 per uur en om hulle dan twee keer na Amerika en terug te laat vlieg op jou eie onkoste,” het Choice berig.

– Volg Nuus24 op Twitter
 

- AP