Tegnologie is vir almal
2010-08-05 03:18
Kaapstad – Tegnologie kan lewens verander en is vir almal bedoel, nie net vir ‘n groep “techies” nie, het Gareth Knight, wat die Tech4Africa konferensie reel.
Knight is in ‘n passievolle kruisvaarder vir die web en sal graag wil sien dat Suid-Afrika vinniger breeband-toegang geniet.
“Die wêreld is besig om te verander en ons kan nie byhou nie, want ons weet nie wat 100 Megabits per sekonde voel en wat jy alles daarmee kan doen nie,” het hy gesê.
Knight, die uitvoerende hoof van Technovated, het besluit om die Tech4Africa konferensie te reël toe hy self tydens ‘n tegnologiese konferensie tot nuwe hoogtes geïnspireer is.
“In 2006 het ek die South by Southwest (SXSW) fees bygewoon en dit het omtrent my lewe verander.
“Ek is die geleentheid gegun om met ongelooflike mense in kontak te kom en dit het my soveel perspektief gegee.
“Toe reken ek ons moet iets soortgelyks in Suid-Afrika doen sodat ons mekaar ook kan inspireer,” sê Knight.
Die konferensie is die 12de en 13de Augustus by The Forum in Bryanston.
Werkswinkels ter inleiding van die konferensie sal die 10de en 11de Augustus gehou word.