'Tegnologie hoef nie vyand te wees'
2011-08-12 07:10
Johannesburg – Selfone en sosiale medianetwerke het ’n waardevolle plek in onderwys en kan, as dit reg gebruik word, eerder ’n kind se vriend as vyand wees.
So meen dr. Beverley Evangeledis, ’n opvoedkundige sielkundige wat as spesialis en berader by die AdvTech- private skole werk en werksessies vir ouers en skoliere aanbied.
Evangeledis sê ouers en onderwysers moet besef die gebruik van tegnologie neem toe in skole.
“Kinders het verskillende leerstyle en met tegnologie kan ’n mens baie meer uit hulle kry.
“Hulle moet egter gelei word om kennis te ontdek en tegnologie tot hul opvoedkundige voordeel in te span.”
Evangeledis sê daar is in verskeie skole voorbeelde van hoe leerlinge tegnologie gebruik om te netwerk om huiswerk te doen.
Sy sê daar is nie ’n regte of verkeerde ouderdom om kinders aan tegnologie bloot te stel nie.
Hoe jonger die kind is, hoe meer betrokke moet ouers egter wees. “Ouers moet uit die staanspoor grense en reëls vir gebruik stel. Hoe jonger kinders is, hoe meer moet ouers sorg dat wagwoorde en kodes bestaan vir byvoorbeeld internetgebruik en hulle moet tegnologiegebruik monitor.”
Evangeledis meen te veel ouers oorhandig net ’n selfoon sonder om aan die gevolge te dink.
“Jy behoort dit te hanteer soos wanneer jy vir jou kind ’n baie duur geskenk met ’n handleiding koop. Julle moet saam deur die aanwysings gaan en besef wat die krag van die toestel is.”
Volgens Evangeledis kan netwerke soos Twitter, Facebook en MXit negatief wees as dit ’n vals gevoel van vriendskap by kinders skep en hulle sosiaal isoleer. “Werklike kommunikasie waar mense mekaar sien en na mekaar luister, bly belangrik.
“As ’n kind se wêreld oorwegend uit die druk van knoppies bestaan, kan hulle later moeilik tussen fantasie en werklikheid onderskei.”
Evangeledis wys daarop dat kuberboeliery en skinder, veral deur meisies, aan die toeneem is en dat ouers baie bedag daarop moet wees.
Oor die hoeveelheid tyd wat kinders op selfone en netwerke deurbring, sê Evangeledis ouers behoort dit streng te beheer.
Anders het ’n mens situasies soos jong kinders wat tot watter tyd in die nag onder hul komberse MXit of SMS en die volgende dag moeg by die skool is.
– Volg Nuus24 op Twitter
- Beeld