Talle toets negatief vir MIV, maar is wel positief
2011-07-29 10:05
Johannesburg – Honderde Suid-Afrikaners wat by klinieke in die land negatief getoets is vir MIV/vigs, is waarskynlik eintlik positief.
Die departement van gesondheid het gister erken hy is bewus van probleme met die G-Ocean-MIV/vigstoets en dat ondersoek ingestel word.
Die Hillbrow-kliniek in Johannesburg het vroeër die week ’n brief aan die departement gerig nadat bevind is dat dié toets in 2% van die gevalle by die kliniek onakkuraat was.
Dit beteken dat minstens 80 van die 4 000 pasiënte wat sedert Januarie daar getoets is MIV-positief is, terwyl hul toetse aangedui het hulle is MIV-negatief.
“Hierdie nuus is katastrofies. Die toets moet onmiddellik onttrek word,” het Francois Venter, president van die HIV Clinicians Society, gesê.
Fidel Hadebe, woordvoerder van die departement van gesondheid, het gesê die toets gaan nié in die stadium onttrek word nie.
“Ons beskou die saak in ’n ernstige lig en sal beslis ondersoek instel, maar ons glo nie die toets is foutief nie.
“Die probleem lê by gebrekkige opleiding van personeellede wat die toets gebruik.”
Volgens Venter word die G-Ocean-MIV/vigstoets as baie betroubaar beskou.
Hy stem saam met Hadebe dat die fout dalk elders lê.
“Ek is bewus van verskeie klinieke in die land waar die personeel nie deeglik opgelei word om die toets uit te voer nie en nie lank genoeg wag dat die toetsstrokie van kleur verander nie.
“Dit is waarskynlik ’n kwessie van gebrekkige opleiding, maar intussen moet die toets onttrek word.”
Jack Bloom, DA-woordvoerder oor gesondheid, was skepties oor die departement van gesondheid se verduideliking.
“Die probleem is baie ernstiger as dit.
“Indien dit die situasie is by ’n kliniek soos Hillbrow in ’n groot stad, dink net wat gebeur by ’n kliniek in landelike KwaZulu-Natal!”
Bloom het gesê dit is angswekkend dat talle mense met MIV/vigs weens onakkurate toetse nie die nodige antiretrovirale middels ontvang nie en die virus moontlik verder versprei.
– Volg Nuus24 op Twitter.
- Beeld