Syfers oor vigs onder jonges skok
2011-08-12 08:23
Johannesburg – Sowat 5% van leerlinge in Suid-Afrika onder die ouderdom van 16 jaar is MIV-positief of het vigs, en onder leerlinge en studente tussen 19 en 29 skiet dit op tot 32,7% van vroue en 17,7% van mans.
Die drastiese toename móét gekeer word, sê die gesondheidsdepartement.
Saadhna Panday, direkteur van gesondheidsopheffing van die nasionale gesondheidsdepartement, het gister ’n nuwe strategie bekend gestel vir die inwerkingstelling van ’n vigsplan om voorkoming van vigs in hoër ouderdomme te verlaag.
Sy was een van die sprekers op ’n konferensie in Bloemfontein oor die voorkoms van vigs in skole.
“Navorsing wat gedoen is, dui daarop dat leerlinge in skole veilig voel. Hulle het ’n doel om voor te lewe en is deel van ’n groter stelsel. Die oomblik wanneer die leerlinge skool verlaat, word hulle met verskeie uitdagings gekonfronteer.”
Sy het gesê armoede en werkloosheid plaas groot druk op jong mense en dit is een van die rede waarom die vigs-syfer die hoogte in skiet.
Panday het gesê daarom wil die departement ’n nuwe vigsplan in werking stel om die voorkoms van vigs reeds op ’n jong ouderdom ’n nekslag toe te dien.
Die departement wil:
– Reeds as deel van basiese onderwys ’n voorkomingsplan en ondersteuningsnetwerk begin.
– Vaardighede onder leerlinge, onderwysers en alle belanghebbendes verhoog. ’n Hele gemeenskap is by onderwys betrokke, nie net leerlinge en onderwysers nie.
– Inligting oor seksuele aktiwiteite wyd beskikbaar stel. Baie onderwysers wil nie oor seks praat nie want hulle verkeer onder die wanindruk dat dit seksuele aktiwiteite sal laat toeneem.
Die nuwe vigsplan moet op vier gebiede ’n verskil maak:
– Leerlinge en opvoeders moet meer openlik oor vigs en gepaardgaande vrese wees.
– Die vigs-syfer van leerlinge tussen die ouderdom van 15 en 19 moet daal. ’n Gesonde uitkyk oor seksuele aktiwiteite moet onder leerlinge gekweek word.)Veiligheid en geestelike veiligheid in skole moet verbeter sodat leerlinge veiliger kan voel.
– Volg Nuus24 op Twitter.
- Volksblad