Swaziland wil MIV-infeksies met besnyding bekamp
2011-02-25 23:03
In Swaziland het die regering met ’n massa veldtog ten gunste van besnyding geloods om teen die wêreld se hoogste MIV infeksiekoers te veg.
Kliniese proewe het aangedui besnyding kan mans se kanse om MIV te kry halveer. Drie studies oor die praktyk was so suksesvol dat dit vroeg beïndig is omdat navorsers van mening was dat dit oneties sou wees om nie die hele kontrolegroep te besny nie.
Besnydenis-programme is in ’n aantal Afrika-lande onderweg, insluitend Kenia, Suid-Afrika, Tanzanië en Zimbabwië. Maar Swaziland se $15-miljoen (sowat R105-mijoen) veldtog om 160 000 mans en tienerseuns binne ’n jaar te besny is die eerste landwye veldtog.
Tyd is van belang, met een uit vier volwassenes wat MIV-positief is and twee persent van die land se 1.2-miljoen mense wat jaarliks as gevolg van die siekte doodgaan.
“As mens dit regkry om dit binne ’n kort tydperk te doen word die impak daarvan meer dramaties gevoel,” het Jennifer Albertini, landsdirekteur vir die Amerikaanse Agentskap vir Internasionale Ontwikkeling en wat die program befonds, gesê.
Gesondheidsamptenare hoop die veldtog sal 88 000 nuwe infeksies verhoed.
“Sodra ons daardie mense red sal ons in staat wees om ons fokus na ander gesondheidsprioriteite te skuif,” het Ayanda Nqeketo, wat die program namens die Swazi-regering koördineer, gesê.
Die besnydings sal óf in klinieke óf in mobiele chirurgiese eenhede binne tente uitgevoer word.
Volg Nuus24 op Twitter.
- AFP