Suid-Korea gaan weer probeer met sateliet

2012-11-22 14:18

Seoul – Suid-Korea gaan weer probeer om ‘n sateliet einde November die ruimte in te stuur, het amptenare in die land bekend gemaak.

Dit sal die land se derde probeerslag in vier jaar wees om ‘n sateliet in die ruimte te kry.

As alles volgens plan verloop sal die sateliet op 29 November vanaf die Naro-ruimtesentrum lanseer word.

Die projek is die afgelope jare deur probleme geteister na mislukte probeerslae in 2009 en 2010. ‘n Suksesvolle lansering is kritiek vir Suid-Korea se kommersiële ruimte ambisies.

Die Korea Space Launch Vehicle-1 (KSLV-1)-vuurpyl gaan ‘n sateliet in die ruimte ontplooi wat meestal data oor ruimte bestraling sal kollekteer.

Die sateliet sou aanvanklik op 26 Oktober die ruimte in gestuur word, maar ingenieurs het op die laaste minuut besluit om nie met die lansering voort te gaan nie nadat ‘n gebreekte rubberseël op die tuig gevind is.

– Volg Nuus24 op Twitter
 

- Sapa - AFP