Suid-Afrika 'loop links en praat regs'
2011-11-29 08:00
Durban – “Suid-Afrika loop links en praat regs.”
Só het Bobby Peek, direkteur van die nie-regeringsorganisasie groundWork, Maandag op COP17 gesê.
Peek het op ’n nuuskonferensie, wat deur Friends of the Earth International (FoEI) aangebied is, gesê Suid-Afrika “hou homself baie groen” op COP17, maar in der waarheid is dit ’n land wat steenkoolmyne in sensitiewe gebiede steun, wat na verwagting die groen lig gaan gee vir hidrobreking in die Karoo en wat (Sasol se) steenkool-tot-brandstoftegnologie “omhels”.
Volgens Peek het Suid-Afrika ook sy krag weggeteken deur kontrakte vir goedkoop elektrisiteit met mynreuse en nywerhede, soos BHP Billiton, te sluit.
“Suid-Afrika praat met ’n gevurkte tong,” het hy gesê.
Nnimmo Bassey, voorsitter van FoEI, het gesê ondanks die wêreldwye ekonomiese krisis is die hoeveelheid kweekhuisgasse in die atmosfeer nou die meeste nog.
Bassey het gesê mense wat meen klimaatsverandering is iets van die toekoms, leef in ’n gekkeparadys. Ons moet nie meer van klimaatsverandering praat nie, maar van klimaatkrisis, “want dit is híér”, het hy gesê en verwys na die duisende klimaatvlugtelinge in die Horing van Afrika.
FoEI meen as ryk lande weier om die armes uit hul klimaatkrisis te help, pleeg hulle “eko-moord”.
“Die rykes wat die klimaatkrisis geskep het, moet verseker dat die temperatuur nie met meer as 2°C styg nie. As die temperatuur met 2°C styg, sal dit ’n doodsvonnis vir Afrika beteken. Afrika gaan kook en sink (in die see verdwyn),” het hy gesê.
Hy het na die vyf mense verwys wat Sondagaand in storms in Durban omgekom het en gesê daar is geen beter bewys dat die klimaatkrisis reeds besig is om sy tol te eis nie.
Alden Meyer van Oxfam het gesê daar is net vyf jaar oor om wegholklimaatsverandering te keer.
Volgens hom het ’n onlangse studie deur die interregeringspaneel oor klimaatsverandering (IPCC) aangetoon daar is ’n duidelike verband tussen uiterste weersomstandighede en die hoeveelheid kweekhuisgasse in die atmosfeer.
Studies wat Oxfam onderneem het, het aangetoon 1 miljard mense in die wêreld gaan saans honger slaap. Hiervan is 239 miljoen in Afrika. Die studie het ook gewys in die laaste jaar het 60% van die beeste en 40% van die skape in Ethiopië weens droogte gevrek.
Die groep nie-regeringsorganisasies het gesê COP17 is waarskynlik die een beraad waarvan die uitkoms die onvoorspelbaarste is.
Volg Nuus24 op Twitter
- Volksblad