Studie: 'n Bietjie lag bring minder pyn
2011-09-14 12:08
Londen – ‘n Goeie lagsessie saam met vriende kan help om pyn te verlig omdat chemiese stowwe die brein met plesier laat oorstroom, het ‘n studie bevind.
Navorsers het ‘n eksperiment uitgevoer waartydens vrywilligers na episodes van die komiese televisiereekse Mr Bean of Friends gekyk het teenoor ander wat na gholf en dokumentêre films oor die natuur moes kyk.
Beide groepe het óf ‘n gevriesde wynverkoeler óf ‘n bloeddrukmeter wat styf gespan is om die arm gehad om bietjie pyn te verskaf.
Slegs 15 minute se gelag het mense se verdraagsaamheid vir die ligte pyn met 10% verbeter, het die navorsers bevind.
Die gholf en die dokumentêre films het egter niks gedoen om die pyn te verlig nie.
"Vrywilligers wat na komedie gekyk het, kon die pyn met meer gemak verdra," het Robin Dunbar van die Oxford-universiteit in Londen gesê.
“Daar bestaan egter tans nie baie navorsing oor hoekom ons lag nie.”
Endorfien, ‘n chemiese stof wat boodskappe tussen neurone oordra, verlig glo die pyn deur boodskappe van fisiese pyn en sielkundige stres te verdoof.
Die navorsing is in die joernaal Proceedings of the Royal Society B gepubliseer.
– Volg Nuus24 op Twitter.
- AFP