Studie: Tieners wéét wat is goeie musiek
2011-06-14 11:16
Washington – Wanneer tieners na sekere liedjies luister kan hul breine aandui of dit ‘n treffer sal wees al dan nie, het Amerikaanse navorsers gesê.
‘n Magnetiese-resonansieskandeerder (MRI) is gebruik om na die tieners se grysstof te kyk en navorsers het bevind aktiwiteit in ‘n sekere deel van die brein is gekoppel aan die genot wat die tieners uit deuntjies put.
Die studie is by die Emory-universiteit in Georgia, VSA onderneem en het 27 tieners tussen die ouderdom van 12 en 17 ingesluit.
Hulle is gevra om na onbekende liedjies, verkry vanaf sosiale netwerk MySpace, te luister.
Die tieners het die MRI-toetse ondergaan terwyl hulle na die liedjies geluister het en hul affiniteit daarvoor bepunt.
Drie jaar na die studie gedoen is, het hoofnavorser Gregory Berns een van die liedjies wat in die studie ingesluit was op die Amerikaanse realiteitsprogram American Idol gehoor.
Kort daarna het hy weer na sy papiere gaan loer om te kyk of die lied se sukses voorspel was deur die tieners se breinaktiwiteit.
“Ons het ‘n betekenisvolle verhouding tussen breinaktiwiteit en die hoeveelheid eksemplare wat die liedjies verkoop het gevind,” het Berns gesê.
‘n Positiewe reaksie in die brein kan sowat ‘n derde van die gewilde liedjies se sukses voorspel terwyl 90% van die liedjies wat min aktiwiteit ontlok het, geflop het, lui die studie.
Hoe die tieners die liedjies bepunt het, was egter geen aanduiding van die lied se potensiële gewildheid nie.
Die studie is in die Journal of Consumer Psychology gepubliseer.
- Sapa - AFP