Studie: Stadsjapies meer sielsiek as plaasjapies

2011-06-23 10:21

San Francisco – Tussen die geraas van sirenes en die wegwys van strooibiljette lyk dit soms of daar ‘n donker streswolk oor stadsjapies se koppe opbou. Nou het ‘n studie van Duitse universiteitstudente se breine dié waarneming bevestig.

Stadsjapies se breine is meer vatbaar vir stres – veral sosiale stres, het Andreas Meyer-Lindenberg van die Duitse Instituut vir Geestesgesondheid bevind.

Meyer-Lindenberg se navorsing is in die wetenskapjoernaal Nature gepubliseer en bevestig ‘n vreesaanjaende tendens: Stadslewe kweek geestesiektes.

In vergelyking met plattelanders het stadsbewoners hoër angsvlakke en is meer buierig. Stadsbewoners se kans op skisofrenie is ook dubbel dié van plaasjapies.

Bestaande navorsing is so deeglik dat wetenskaplikes reken die effek is nie slegs ‘n korrelasie nie; angstige mense verkies dus nie bloot om in die stad te woon nie.

Dit is ook nie oorerflik nie, meen navorsers.

Dit is ‘n oorsaak-en-gevolg-verhouding tussen die omgewing en die geestestoestand.

Lees meer hier.

– Volg Nuus24 op Twitter.