Studie: SA grootste tweeter op Afrika-kontinent
2012-01-26 17:42
Johannesburg – Suid-Afrika is die land op die Afrika-kontinent wat die meeste tweet – met meer as vyf miljoen tweets wat in die laaste drie maande van 2011 gestuur is, het navorsing wat Donderdag gepubliseer is, getoon.
‘n Ontleding van meer as 1,5 miljoen tweets van oor die kontinent en ‘n opname van 500 van Afrika se aktiefste Twitter-gebruikers, het getoon dat Kenia, met 2 476 800 tweets, die tweede aktiefste is.
Volgens Portland Communications en Tweetminster wat die studie uitgevoer het, was Nigerië derde (1 646 212), Egipte vierde (1 214 062) en Marokko vyfde (745 620).
Die studie het bevind dat 57% van tweets uit Afrika vanaf selfone gestuur is.
Daar is ook bevind dat 60% van Afrika se aktiefste Twitter-gebruikers tussen 20 en 29 jaar oud is en dat 81% van die wat aan die opname deelgeneem het, dit gebruik om met vriende te kommunikeer.
Sowat 68% het aangedui dat hulle Twitter gebruik om die nuus dop te hou en 22% om vir werksgeleenthede te soek.
Twitter-gebruikers in Afrika is aktief op ander platforms van sosiale media, insluitend Facebook, YouTube, Google+ en LinkedIn.
“Een van die meer verrassende bevindinge van die navorsing is dat meeste openbare figure nog nie deel is van Twitter in Afrika nie,” het Mark Flanagan, Portland se vennoot vir digitale kommunikasie, gesê.
“Met ‘n paar uitsonderings het ons bevind dat besighede en politieke leiers grotendeels afwesig was van die debatte wat oor die kontinent op Twitter afgespeel het.”
Hy het bygevoeg dat hulle nie eintlik kon bekostig om weg te bly uit ‘n ruimte waar dialoog besig is om toe te neem nie.
Meeste van diegene wat aan die opname deelgeneem het, het gesê minstens die helfte van die mense wat hulle op Twitter volg is op die kontinent gebaseer.
– Volg Nuus24 op Twitter
- SAPA