Studie: Jongmense ly aan selfoon-angs
2011-05-19 12:40
Taipei – Meer as 90% van studente in Taiwan raak paniekerig of bekommerd as hulle nie hul selfone kan gebruik nie, het ‘n studie getoon wat Woensdag bekendgestel is.
Die King Car Education Foundation het in April ‘n studie op 2 141 leerders van graad drie tot universiteitsvlak gedoen om te bepaal hoe selfoongebruik hul lewens raak.
Altesaam 80% van die deelnemers het selfone gehad, ‘n toename van 15% sedert 2009.
Byna 100% van hoërskoolleerders en oueres besit hul eie fone, in vergelyking met 45% van laerskoolleerlinge.
Ten spyte van al die voordele van selfone lei dit ook tot angs, het die studie gevind.
Uit die studente in die studie het 93% gesê hulle voel paniekerig of ongemaklik as hulle nie oproepe kan maak of die battery pap is nie.
Verder is daar vasgestel dat hulle bekommerd raak as hul selfoon nie lui nie of as hulle nie kan deurkom na iemand nie.
Op ‘n vraag oor hoe hulle oor die lewe sal voel sonder hul selfone, het 33,7% gesê hulle is bang hulle sal verveeld raak. Verder het 19,3% gesê hulle sal bekommerd wees dat hulle kontak met vriende sal verloor.
“Selfoongebruik het ‘n daaglikse noodsaaklikheid vir tieners geword,” het Chan Chi-feng van die Nasionale Taiwan Universiteit-hospitaal gesê.
“Dit het beide positiewe en negatiewe effekte op gesondheid, maar die tekens is nie so duidelik soos rekenaar- of internet-verslawing nie,” het die stigting se verslag hom aangehaal.
Volg Nuus24 op Twitter
- Sapa-DPA