Studie: Jong mans wil minder seks hê
2011-05-04 09:14
Sydney – Nie alle jong mans het ‘n ontembare drang vir seks nie. Inteendeel, baie van dié ramkatte wil minder, nie meer, kafoefel.
Volgens ‘n opname in Australië het 12% van mans tussen die ouderdomme van 16 en 24 gesê hulle wil minder seks hê, die grootste proporsie van enige groep.
“Al is dit steeds ‘n minderheid, bewys dit jong mans wat enigiets sal doen om seks te hê is ‘n mite,” het Juliet Richters, professor van seksuele gesondheid aan die New South Wales-universiteit, gesê.
Richters en haar kollegas het 4 300 heteroseksuele mans en 4 400 vroue oor hul voorkeure ondervra.
Slegs 31% van die mans in dié groep wou meer seks hê, die kleinste proporsie van enige groep.
“Gretige meisies wat tot hul ore toe verlief is mag dalk die jong mans oorweldig,” het Richters bespiegel. “Mans van daardie ouderdom neem omtrent ‘n jaar voor hulle ernstig oor ‘n verhouding raak.”
Die wiel draai tussen die ouderdomme 35 en 44 jaar, met sowat 57% van dié groep droëbekmans wat meer seks verlang. Ongelukkig stem slegs 28% van hul vroulike tydgenote met hul drange saam.
“Die biologiese verduideliking dui vroue stel meeste in seks belang wanneer hulle swanger kan raak. Tydtekorte, druk en moegheid dra ook by,” het Richter gesê.
“Ek bedoel, seks is natuurlik ‘n luuksheid.”
Volg Nuus24 op Twitter.
- Reuters