Studie: Facebook-vriende raak uitgekuier
2011-08-23 10:49
New York – As jy dit onlangs makliker gevind het om nie op Facebook vriende se gekerm te lees nie – is jy nie alleen nie, het ‘n nuwe studie bevind.
Die internet-navorsingsgroep Global Web Index het die sosiale netwerk tussen Julie 2009 en Junie 2011 dopgehou en bevind verskeie Facebook-aktiwiteite word nou minder gretig aangepak.
Vriende stuur wêreldwyd 7.4% minder boodskappe sedert die begin van die studie.
Vriendekringe word ook versadig en gebruikers soek nou 4.5% minder na nuwe kenisse.
Die geklets met Facebook se Chat-funksie het ook met 1.5% afgeneem terwyl die stuur van digitale geskenkies met sowat 7.5% gedaal het.
Facebook ontken egter sy vriende raak uitgekuier.
“Dikwels is studies soos dié nie geloofwaardig nie,” het ‘n woordvoerder van die maatskappy gesê. “Ander faktore dra by tot die veranderde gebruik van die netwerk,” het sy gesê.
“Mense gebruik byvoorbeeld die internet minder gedurende die somer,” het sy bygevoeg.
“Facebook is tevrede met sy groei en met die manier wat mense die netwerk gebruik.”
– Lees meer hier.
– Volg Nuus24 op Twitter.