Stryd woed om beheer oor internet
2012-10-29 10:29
Washington – 'n Stryd om beheer oor die internet kan in Desember behoorlik begin woed wanneer afgevaardigdes in Doebai byeenkom vir 'n relatief obskure vergadering van 'n agentskap van die Verenigde Nasies (VN).
Voorstelle oor nuwe wêreldwye telekommunikasiereëls wat tot gevolg kan hê dat die VN sekere dele van die internet beheer, sal by dié vergadering bespreek word.
Rusland, China en ander lande is ten gunste van 'n voorstel om die internet onder beheer te plaas van die Internasionale Telekommunikasie-unie (ITU), 'n VN-agentskap wat die tegniese standaarde bepaal wat internasionale telekommunikasie beheer.
Amerikaanse amptenare voel egter 'n stap van dié aard kan vryheid op die internet beperk, en kan amptenare in sommige lande in staat stel om burgerlikes te teister wat nie met heersende politieke menings saamstem nie.
Waarnemers sê verskeie outoritêre regimes sal die voorstel steun, terwyl die grootste Westerse moondhede dit sal teenstaan.
"Dit sal waarskynlik lei tot 'n gelykopuitslag, en as dit gebeur sal daar nie enige dramatiese veranderings wees nie, hoewel sake tog kan verander as ontwikkelende lande sterk daarop aandring," het James Lewis, direkteur van die Program vir Tegnologie en Openbare Beleid by Washington se Sentrum vir Strategiese en Internasionale Studies, gesê.
"Maar daar is baie ontevredenheid oor hoe die internet bestuur word en die VSA sal dit in een of ander stadium moet hanteer."
Lewis het gesê daar is steeds 'n oorweldigende persepsie dat die VSA die internet besit en beheer.
– Volg Nuus24 op Twitter.
- AFP
