Storm oor jagluiperds se skietdood
2012-07-04 10:59
Windhoek – Dit blyk dat mens-dier-konflik die oorsaak is van die skietdood van die drie jagluiperds van Sandfontein-lodge in die suide van Namibië, wat verlede jaar deur N/’an ku sê daar vrygelaat is, het die Republikein-koerant Woensdag berig.
’n Storm het losgebars om die karkasse van die drie jagluiperds wat op die plaas Silwerstroom van Bertus Fokkens deur sy neef doodgeskiet is.
Die drie jagluiperdmannetjies is geskiet en deur plaaswerkers opgeëet, het dr. Rudie van Vuuren, direkteur van N/a’an ku, gesê.
Fokkens het Dinsdag gesê dat sy suster se seun in sy vroeë twintigs, Dawie Olivier, geen keuse gehad het as om die jagluiperds te skiet wat sy 20 werkers se lewens in gevaar gestel het nie.
“Dawie het twee waarskuwingskote afgevuur om die drie jagluiperds te verwilder, maar hulle het net nader gekom. Die jagluiperds was 50 meter van die werkers se huise af,” het Fokkens gesê.
Van Vuuren bevraagteken dit weer of jagluiperds sal nader kom as hulle skote hoor.
Fokkens, ’n aartappelboer, was nie ten tyde van die skietvoorval by die huis nie, maar het by sy buurman vleis gebraai. “Ek kan nie sien hoe die situasie anders hanteer kon word, veral as 20 mense se lewens in gevaar is nie,” het hy gesê.
Lees die volledige artikel hier.
– Republikein
