Stofsuier met sin vir humor kan drie tale praat
2012-05-08 10:00
Tokio – Dit lyk soos iRobot se Roomba-stofsuier, maar die nuwe ronde stofsuier van Sharp Corp. is vaardig in drie tale en kan selfs ‘n humoristiese dialek praat.
Cocorobo, wat ook foto’s wat by jou huis geneem is na jou selfoon kan stuur, sê 36 frases, insluitende “Lanklaas gesien” en “Hallo,” in Japannees, Engels en Chinees.
Die Japannese elektronika-vervaardiger het Dinsdag gesê die robot kan ook die Kansai-dialek praat wat in die suidweste van Japan gepraat word en is glo meer humoristies as standaard Japannees.
Nietemin is sy taalvaardigheid ontwerp vir pret en nie om komplekse bevele of lang dialoë te voer nie.
Die masjien, wie se naam ‘n speling is op die woord vir “hart,” of “kokoro,” sal op die vraag “Hoe gaan dit?” antwoord, “So goed.”
In die Kansai-dialek sal dit die ekwivalent sê van “Ek is koel en voel goed.”
Sharp is in Osaka gebaseer waar die Kansai-dialek gepraat word.
Cocorobo word vir 130 000 yen (R12 700) verkoop en sal van volgende maand in Japan op die rakke verskyn.
Spesifieke datums vir ander lande was nog nie bekend nie.
Die handige robot, wat so groot is soos ‘n gewone etebord, suiwer die lug terwyl dit deur ‘n vertrek beweeg en is handig om verlore items onder meubels te vind deurmiddel van sy ingeboude kamera, het Sharp gesê.
– Volg Nuus24 op Twitter
- Sapa - AP
