Sterrekundiges opgewonde oor SKA

2012-07-09 19:41

Pretoria – Suid-Afrikaanse sterrekundiges is opgewonde oor die vooruitsig om deel te wees van die navorsing vir die Square Kilometre Array-teleskoop (SKA), het ‘n amptenaar Maandag in Pretoria gesê.

Nithaya Chetty, hoof van astronomie by die Nasionale Navorsingstigting, het gesê daar sal geen ruimte vir middelmatigheid in die projek wees nie.

“Daar was baie euforie by die vergadering. Wetenskaplike leiers en al die ander is ekstaties oor wat dit vir Suid-Afrika gaan beteken,” het hy gesê.

Sterrekundiges en akademici van oor Suid-Afrika heen het ‘n beraad van twee dae by die Universiteit van Pretoria gehou.

“Hierdie is die eerste groot bymekaarkoms van sterrekundiges in Suid-Afrika sedert die SKA-aankondiging in Mei-maand gemaak is. Hierdie is ‘n groot byeenkoms wat sterrekundiges sowel as die regering betrek.”

Chetty het gesê dat die astronomie-afdeling tot dusver goeie ondersteuning by die regering gekry het.

"Die ondersteuning kom reg van bo af, ons is dankbaar vir minster (van wetenskap en tegnologie) Naledi Pandor. Ons geniet ongekende en uitstekende ondersteuning van die regering af,” het Chetty gesê.

– Volg Nuus24 op Twitter

- SAPA