Sterrekundiges ontdek planeet met vier sonne
2012-10-16 12:00
Washington – 'n Internasionale span amateur- en professionele sterrekundiges het 'n planeet ontdek wat deur vier sonne verlig word – die eerste ontdekking in sy soort.
Die planeet, wat sowat 5 000 ligjaar van die aarde af geleë is, is PH1 gedoop ter ere van die Planet Hunters-program, wat vrywilligers aanstel om nuwe planete te soek.
Die program word deur Yale-universiteit in Amerika aangebied.
PH1 wentel om twee sonne en word ook deur sterre omwentel. Navorsers sê slegs ses ander planete wentel om twee sterre, maar nie een van dié ses word deur ander sterre omwentel nie.
“Die ontdekking van die planete dwing ons terug na die tekenbord om te verstaan hoe sulke planete kan ontstaan en ontwikkel in sulke dinamies uitdagende omgewings,” het Meg Schwamb, hoofskrywer van die verslag wat Maandag by die jaarlikse Amerikaanse Sterrekundige Vereniging-vergadering bekend gestel is, gesê.
Kian Jek en Robert Gagliano was die eerste twee wetenskaplikes om PH1 te identifiseer. Hulle ontdekking is bevestig deur ‘n span Britse en Amerikaanse navorsers in Hawaii.
PH1 is 'n gasreus met 'n radius wat sowat 6,2 keer groter as dié van die aarde is.
Wetenskaplikes het verlede week gesê hulle het ‘n “diamant-planeet” ontdek wat twee keer groter as die aarde is.
Sowat ‘n derde van die planeet se massa en die meeste van die oppervlakte bestaan glo uit diamante.
– Volg Nuus24 op Twitter
- AFP
