Sterk intuïsie beïnvloed geloof in God
2011-09-22 11:14
New York – ‘n Studie het bevind mense se intuïsie beïnvloed of hulle in ‘n welwillende God glo.
Mense wat oor die algemeen meer intuïtief optree en besluite maak is meer geneig om in God te glo in vergelyking met mense wat peins oor hul besluite, het navorsers bevind.
“Ons glo in God omdat ons intuïsie oor hoe en hoekom dinge gebeur ons oortuig daar is ‘n goddelike doel wat ons dryf,” het die navorser Amitai Shenhav van die Harvard-universiteit in Amerika gesê.
Shenhav het in die studie vir vrywilligers gevra om ‘n eenvoudige wiskundesom om op te los.
“’n Kolf en ‘n bal kos $1.10 in totaal. Die kolf kos $1 meer as die bal. Hoeveel kos die bal?”
Die intuïtiewe antwoord op sy vraag is 10 c, aangesien die meeste intuïtiewe mense geneig is om $1 van die totaal af te trek.
Die “deurdinkte” antwoord is egter 5 c.
Soos hy voorspel het, is mense wat die eerste antwoord gegee het 1.5 keer meer geneig om gelowig te wees as mense wat die regte antwoord gegee het.
Shenhav se navorsing is in die Journal of Experimental Psychology gepubliseer.
– Lees meer hier.
– Volg Nuus24 op Twitter.