Stelsel hou staatskarre goed dop
2011-09-01 09:13
Johannesburg – Die Mpumalanga-regering is besig om ’n omvangryke stelsel te ontwikkel om die misbruik van staatsvoertuie hok te slaan.
Jacob Rabodile, direkteur-generaal, het gister op ’n sitting van die staande komitee vir openbare rekeninge (Skoor) gesê die misbruik van staatsvervoer is ’n groot kommer vir die regering.
“Boetes, ongelukke en instandhouding van staatsvoertuie kos die staat jaarliks miljoene.”
Die regering het alle staatsvoertuie reeds vroeër met GPS-stelsels toegerus, maar Rabodile het gesê dit is onvoldoende.
Die nuwe stelsel is baie gesofistikeerd en alle staatsvoertuie sal daarmee aan ’n sentrale beheerkamer gekoppel word.
“Ons sal presies kan weet waar die voertuig te alle tye is en hoe die bestuurder daarvan die voertuig hanteer,” het Rabodile gesê.
As die bestuurder ’n oortreding begaan, soos om te vinnig te ry, sal hy elektronies van die beheerkamer gewaarsku word.
“Indien die bestuurder nie gehoor gee aan die waarskuwing nie, sal ons die voertuig elektronies kan afskakel.”
Volgens hom sal die stelsel ook gebruik word om te sien of staatsvoertuie van die vooraf goedgekeurde roetes afwyk.
Personeel wat staatsvoertuie vir private doeleindes gebruik, moet ook voor stok gekry word, het me. Nomsa Mtsweni, voorsitter van Skoor gesê.
Sy het ’n foto aan die komitee gewys waar ’n amptenaar besig is om boumateriaal met ’n staatsvoertuig op te laai.
Fish Mahlalela, ANC-lid van Skoor, het gesê ’n gevorderde moniteringstelsel sal nutteloos wees as daar nie ’n behoorlike vervoerbeleid is nie.
“Die huidige beleid bepaal reeds dat geen personeellid ’n staatsvoertuig huis toe mag neem nie, behalwe as daar uitdruklike toestemming van die betrokke departement se bestuurshoof is.
“Die beleid word egter nie deur die rekenpligtige amptenare van departemente toegepas nie.”
– Volg Nuus24 op Twitter.
- Beeld